Share :
Shantilata Barikଶାନ୍ତିଲତା ବାରିକ(ଛୋଟରାୟ) ଓଡ଼ିଆ ସଙ୍ଗୀତ ଜଗତର ଏକ ପରିଚିତ ତଥା ସ୍ପର୍ଦ୍ଧିତ ନାମ୤ବିଶେଷ କରି ଓଡ଼ିଆ ଭଜନ ଗାୟିକା ଭାବେ ସେ ସ୍ରୋତାମାନଙ୍କ ନିକଟରେ ନିଜର ସ୍ବତନ୍ତ୍ର କଣ୍ଠ ପାଇଁ ବେଶ୍‌ ପ୍ରତିଷ୍ଠା ଲାଭ କରିଛନ୍ତି୤ ଏକାଧାରରେ ଜଣେ ଅଧ୍ୟାପିକା, ସୁଗୃହିଣୀ ସହିତ ଜଣେ ଆଗଧାଡ଼ିର କଳାକାରଭାବେ ଓଡ଼ିଆ ସଙ୍ଗୀତ ଜଗତରେ ତାଙ୍କର ଏକ ନିଆରା ପରିଚୟ ରହିଛି୤ ପାରମ୍ପରିକ ଢାଞ୍ଚାରେ ସଙ୍ଗୀତ ଗାନ କରିବାରେ ତାଙ୍କର ଶୈଳୀ ନୂତନ ପିଢ଼ୀର ଶିଳ୍ପୀମାନଙ୍କ ପାଇଁ ପ୍ରେରଣାର ଉତ୍ସ୤

(୧) ଆପଣଙ୍କ ଜୀବନରେ ସଙ୍ଗୀତର ମୂଳଦୁଆ କିପରି ପଡ଼ିଲା ?

ଭଗବାନଙ୍କର ପ୍ରଥମ ଆଶୀର୍ବାଦ୤ ପୂର୍ବଜନ୍ମର ପୁଣ୍ୟର ସ୍ବୀକୃତି, ପିତାମାତାଙ୍କ ଆର୍ଶୀବାଦ ଓ ପ୍ରଚେଷ୍ଟା୤ ପ୍ରଥମେ ସାହି ଭିତରେ ଶବ୍ଦରେ ଝୁଲା ପକେଇ ସଙ୍ଗୀତ ଶିଖାଇଥିଲେ ବାପା୤ ପରେ ମୁଁ ବୁଲି ବୁଲି ସଙ୍ଗୀତ ଗାଇବା ଆରମ୍ଭ କଲି୤ ପିତାମାତାଙ୍କ ଠାରୁ ଶିଖିଥିଲି୤ ବାପା ଶିଖେଇଥିଲେ ‘ଜଗବନ୍ଧୁ ତୁମେ ବଡ଼ କପଟୀ’ ଗୀତରୁ ମୋର ପ୍ରଥମ ଭଜନ ଗାଇବା ଆରମ୍ଭ ହୋଇଥିଲା୤

(୨) ଆପଣଙ୍କ ପ୍ରଥମ ଗୀତର ରେକର୍ଡ଼ିଂ କେବେ ହୋଇଥିଲା ଏବଂ ଏହାର ଅନୁଭୂତି କିପରି ଥିଲା ?

ମୁଁ ଉତ୍କଳ ସଙ୍ଗୀତ ମହାବିଦ୍ୟାଳୟ ୯ ବର୍ଷ ବୟସରେ ଯାଇ ଫେରି ଆସିଥିଲି ପୁଣି ଦ୍ବିତୀୟ ଥର ଆସି ଓଡ଼ିଆ ସଙ୍ଗୀତରେ ନାମ ଲେଖାଇଥିଲି୤ ସେଠାରେ ଗୁରୁ ବାଳକୃଷ୍ଣ ଦାଶ ଓ ଗୁରୁ ମାର୍କଣ୍ଡେୟ ମହାପାତ୍ର ଏବଂ ଗୁରୁ ଗୋପାଳ ପଣ୍ଡାଙ୍କ ଠାରୁ ଶିକ୍ଷା ନେଲି୤ କ୍ୟାସେଟ୍‌ ରେକର୍ଡ଼ିଂ ପାଇଁ ମୁଁ ଗୁରୁ ବାଳକୃଷ୍ଣ ସାର୍‌ଙ୍କ ସଙ୍ଗେ ଏକ ରେକର୍ଡ଼ କମ୍ପାନୀରେ ସାକ୍ଷାତକାର ପାଇଁ ଯାଇଥିଲି୤ ସେହି କମ୍ପାନୀ ଥିଲା କଲିକତାର ଏନ୍‌ରିକୋ୤ ପ୍ରଥମେ ଏହି କମ୍ପାନୀ ପାଇଁ ଗାଇଥିଲି୤ ସେଥିରେ ଦୁଇଟି ଗୀତ ଥିଲା, ‘ହେ ଚକାନୟନ’ ଓ ‘ମଲ୍ଲୀଫୁଲ ଗଜରା ମାଳ’୤ ଆମେ ଓଡ଼ିଶା ଭବନରେ ରହିଥିଲୁ୤ ରାତିରେ ମତେ ନିଦ ନଥିଲା୤ ବହୁତ ଖୁସି ହୋଇଥିଲି୤ ଗାଇଲାପରେ ମୋର ‘ଫ’ ଶବ୍ଦ ବାଧା ଦେଇଥିଲା ଓ ତାହା ଦୁଇଟି ଟେକ୍‌ରେ ଠିକ୍‌ ହୋଇଥିଲା୤ ଏହି ଗୀତ ବେଳେ ମୋତେ ୧୫ ବର୍ଷ ହୋଇଥିଲା୤ ତା ପୂର୍ବରୁ ରେଡ଼ିଓରେ ଶିଶୁ ସଂସାର କାର୍ଯ୍ୟକ୍ରମର ସିଧା ପ୍ରସାରଣରେ ଶିଶୁ ସଙ୍ଗୀତଟିଏ ଗାଇଥିଲି୤

(୩) ଆଜିକାର ଭଜନ ବା ଜଣାଣ କଣ୍ଠଶିଳ୍ପୀଙ୍କ ସ୍ବରରେ ପୂର୍ବେ ଥିବା ଭକ୍ତିଭାବର ଛାପ ଶୁଣିବାକୁ ମିଳୁନି ବୋଲି ସର୍ବଦା ଆଲୋଚନା ହେଉଛି୤ ଏହା ସମ୍ବନ୍ଧରେ ଆପଣଙ୍କର ମତାମତ କ’ଣ ?

ଏହା ଏକ ତିକ୍ତ ଅନୁଭୁତି୤ ମନରେ କେବଳ ଦୁଃଖ ହିଁ ଆସୁଛି୤ ଭଗବାନ ଆସିଲେ ବି ଏହା ବଦଳିବନି୤ ଲୋକମାନେ ହିଁ ବଦଳାଇପାରିବେ୤

(୪) ଆପଣଙ୍କ ମତରେ କେଉଁ ଉପାଦାନଟି ଆଜିର ଓଡ଼ିଆ ସଙ୍ଗୀତରେ ଅଭାବ ରହୁଛି ଏବଂ କାହିଁକି ?

‘ଭାବ’ ଉପାଦାନର ହିଁ ଅଭାବ ରହୁଛି୤ ଅର୍ଥ ଓ ଯଶ ପାଇଁ ଯାହାକିଛି କରିବାକୁ ବି ସଙ୍ଗୀତ କଳାକାରଟେ ପଛଉନି୤ ତେଣୁ ‘ଭାବ’ ଉପାଦାନଟି ଏଠି କ୍ଷୟ ହେଉଛି୤ ଏହା ଦ୍ବାରା ଆମ ପରମ୍ପରାର କ୍ଷତି ହେଉଛି୤

(୫) ସମସ୍ତେ ଆମ ଓଡ଼ିଆଙ୍କ ଆରାଧ୍ୟ ଦେବତା ମହାପ୍ରଭୁ ଶ୍ରୀଜଗନ୍ନାଥଙ୍କୁ ନେଇ ପରୋକ୍ଷରେ ଏକପ୍ରକାର ଶସ୍ତା ସଙ୍ଗୀତର ବ୍ୟବସାୟ କରୁଛନ୍ତି କି ? ଯଦି ହିଁ ତେବେ କାହିଁକି ?

ନିଶ୍ଚିତ ଭାବେ୤ ଏହି କଥା ମୁଁ ପୂର୍ବ ପ୍ରଶ୍ନର ଉତ୍ତରରେ କହିସାରିଛି୤

(୬) ଭଜନ, ଜଣାଣ, ଆଧୁନିକ, ଶାସ୍ତ୍ରୀୟ ସଙ୍ଗୀତ ଏ ମଧ୍ୟରୁ ଆପଣଙ୍କ ଶ୍ରେଷ୍ଠ ପସନ୍ଦ କେଉଁଟି ଏବଂ କାହିଁକି ?

ସବୁ ସଙ୍ଗୀତ ମତେ ଭଲ ଲାଗେ୤ ପୂଜାବେଳେ ଭଜନ ଦରକାର୤ ଚାଷୀ ବିଲକୁ ଗଲାବେଳେ ତା’ ପାଇଁ ପଲ୍ଲୀଗୀତଟିଏ ଦରକାର୤ ମଣିଷର ବିଭିନ୍ନ ଅବସ୍ଥାକୁ ନେଇ ସଙ୍ଗୀତର ଆବଶ୍ୟକତା ଅଛି୤ ଯଦି ଚୁଡ଼ିଟାକୁ ଆମେ ଗୋଡ଼ରେ ପିନ୍ଧିବା ତାହା ଶୋଭନୀୟ ହେବ କି ? କୌଣସି ସଙ୍ଗୀତ ଖରାପ ନୁହେଁ୤

(୭) ଆପଣଙ୍କ ନଜରରେ ଭଜନ ସମ୍ରାଟ୍‌ ସ୍ବର୍ଗୀୟ ଭିକାରୀ ବଳ, ଏବଂ ସ୍ବର୍ଗୀୟ ବାଣୀକଣ୍ଠ ନିମାଇଁ ଚରଣ ହରିଚନ୍ଦନଙ୍କ ମଧ୍ୟରେ କିଛି ପାର୍ଥକ୍ୟ ଅଛି କି ? ଆପଣଙ୍କ ସ୍ଥାନ ଏହା ମଧ୍ୟରେ କ’ଣ ?

ନାଁ ମୁଁ ସେମିତି କିଛି ବି ଦେଖିନି୤ ସେମାନଙ୍କ ସମର୍ପଣ ଭାବରେ ସମାନତା ଥିଲା, କିଛି ପାର୍ଥକ୍ୟ ନାହିଁ୤ ମୁଁ ମୋର ଚିନ୍ତାଧାରା କେବଳ ପ୍ରଭୁଙ୍କ ପାଖେ ସମର୍ପଣ କରିଛି, ଆଉ କିଛି ନୁହେଁ୤

(୮) ଆଜିର ଚିକ୍‌ମିକ ରଙ୍ଗୀନ ଦୁନିଆ, ଧାଁଦଉଡ଼ ପ୍ରତିଯୋଗୀତା, ସଙ୍ଗୀତ ଦଉଡ଼ ଭିତରେ ଆପଣଙ୍କ ସ୍ଥାନ କେଉଁଠି ?

ମୋ ସ୍ଥାନ ପ୍ରଭୁଙ୍କ ସେବାରେ୤ କାରଣ ସେ ରହିବାକୁ ନିବାସଟେ ଦେଇଛନ୍ତି, ପରିବାରଟେ ଦେଇଛନ୍ତି, ଚାକିରୀଟେ ମଧ୍ୟ ଦେଇଛନ୍ତି୤ ସବୁଠୁ ବଡ଼ କଥା ମୋ ପାଇଁ ହେଉଛି ଯେ, ସେ ମତେ ଗାଇବାକୁ ଶକ୍ତି ଦେଇଛନ୍ତି୤ ସବୁକିଛି ତାଙ୍କ ନାମକୁ ଧରି୤

(୯) ଆପଣଙ୍କ ପରିବାର ସମ୍ପର୍କରେ କିଛି କୁହନ୍ତୁ୤

ସ୍ବାମୀ ଶ୍ରୀଯୁକ୍ତ ବସନ୍ତ କୁମାର ଛୋଟରାୟ୤ ବଡ଼ପୁଅ ଅବିନାଶ ଛୋଟରାୟ(କାହ୍ନା), ସାନପୁଅ ସତ୍ୟଜିତ୍‌ ଛୋଟରାୟ(ସୋନା)୤ଠାକୁରଙ୍କ ଆର୍ଶୀବାଦ ବଳରେ ମୋ ଛୋଟ ସଂସାରକୁ ନେଇ ମୁଁ ଚାଲିଛି୤ ଏହା ମୋର ସଂସାର୤

(୧୦) ଭଜନ, ଜଣାଣ କିମ୍ବା ଲଘୁ ସଙ୍ଗୀତ ଇତ୍ୟାଦିର ଗୀତିକାରମାନେ ନିଜ ଲେଖାର କିମ୍ବା ପାରିଶ୍ରମିକର ଉଚିତ୍‌ ମୂଲ୍ୟ ଓ ସମ୍ମାନ ପାଉଛନ୍ତି କି ?

ଯେଉଁମାନେ ଉପଯୁକ୍ତ ସେମାନେ ପାଉନାହାନ୍ତି୤ ଯେଉଁମାନେ ସମର୍ପିତ ସେମାନେ ଆଶା କରୁନାହାନ୍ତି୤ ଆଉ କେତେଜଣ ପେଟପାଇଁ ନେଉଛନ୍ତି, କିନ୍ତୁ ସମ୍ମାନ ଟା ଉଚିତ୍‌ ଭାବେ ମିଳୁନାହିଁ୤

(୧୧) ଗାଁ ଏବଂ ସହରରେ ଥିବା ଶ୍ରୋତାମାନଙ୍କ ମଧ୍ୟରୁ ଅଧିକ ସମ୍ମାନ ଆପଣ କେଉଁଠୁ ପାଇଛନ୍ତି ?

ଗାଁରେ ବେଶୀ ସମ୍ମାନ ପାଇଛି୤ ସହରରରେ କେବଳ ଲୋକ ଦେଖାଣିଆ ସମ୍ମାନ ପାଏ୤

(୧୨) ମଞ୍ଚ, ବେତାର, ଟେଲିଭିଜନ ଅବା ଚଳଚ୍ଚିତ୍ର, ଏ ସମସ୍ତ ମଧ୍ୟରୁ କେଉଁଠାରେ ଗାଇବାକୁ ସବୁଠୁ ବେଶୀ ପସନ୍ଦ କରନ୍ତି ?

ମଞ୍ଚ ଉପରେ୤ ଚଳଚ୍ଚିତ୍ର “ବାସନ୍ତୀ ଅପା’ରେ ଗୋଟିଏ ଭଜନ ଗାଇଛି୤ ଭଜନଟି ଥିଲା ‘‘ମା’ ମଙ୍ଗଳା….୤

(୧୩) ଆପଣଙ୍କ ମତରେ ଭଜନକୁ ଶ୍ରୋତାମାନେ ବୁଝିପାରନ୍ତି ନା କେବଳ ଶୁଣନ୍ତି ?

ଶଙ୍କରଙ୍କ ମତରେ ଜ୍ଞାନୀଗୁଣୀମାନେ ଗୀତର ମର୍ମ ବୁଝନ୍ତି ଓ ଶୁଣନ୍ତି ଏବଂ ଚୈତନ୍ୟଙ୍କ ମତରେ ଶୁଣନ୍ତି ଓ ଖୁସିରେ ନାଚନ୍ତି୤

(୧୪) ସକାଳର ବେତାର କିମ୍ବା ଟେଲିଭିଜନରେ ନିଜ କଣ୍ଠସ୍ବର ଯେବେ ଶୁଣନ୍ତି, ସେତେବେଳେ କିପରି ଅନୁଭବ ହୁଏ ?

ବହୁତ ଭଲ ଲାଗେ୤ ଦୋଷତ୍ରୁଟିକୁ ଖୋଜେ୤ ଭଲ ଭଲ ଗୀତକୁ ଗାଇବାକୁ ପୁଣି ଇଛା ହୁଏ୤

(୧୫) ନିଜକୁ ଜଣେ କଳାକାର, ଅଧ୍ୟାପିକା, ଗୃହିଣୀ ମଧ୍ୟରୁ କେଉଁ ଭୂମିକାରେ ଅଧିକ ପସନ୍ଦ କରିବେ ?

କଳାକାର ଭୂମିକାରେ ନିଜକୁ ଅଧିକ ପସନ୍ଦ କରେ୤ ଜୀବନ ନାଟକରେ ଏଇ ଚରିତ୍ରଟି ମୋତେ ଖୁବ୍‌ ଭଲ ଲାଗେ୤

(୧୬) ଓଡ଼ିଆ ସଙ୍ଗୀତର ଭବିଷ୍ୟତ ବିଷୟରେ ଆପଣଙ୍କ ମତାମତ କ’ଣ ?

ଆଜି ତାରିଖରେ ଯେଭଳି ପ୍ରଚାରପ୍ରସାର ଚାଲିଛି୤ ଯଦି ପରମ୍ପରା ଓ ସଂସ୍କୃତିକୁ ଛାଡ଼ି ଦିଆଯାଏ ତେବେ ଭବିଷ୍ୟତ ଅନ୍ଧାର୤

(୧୭) ବର୍ତ୍ତମାନର ଭଜନ କିମ୍ବା ଜଣାଣ ମଧ୍ୟରୁ ଆପଣଙ୍କ ପସନ୍ଦର କଣ୍ଠଶିଳ୍ପୀ କିଏ ? ତାଙ୍କର ସ୍ବତନ୍ତ୍ରତା କ’ଣ ବୋଲି ଆପଣ ଭାବୁଛନ୍ତି ?

କେବଳ ଶୁଣୁଛି୤

(୧୮) ଆପଣ ନିଜର ପିଲାମାନଙ୍କୁ କଳାକାର ଭାବେ ଦେଖିବାକୁ ଇଚ୍ଛା ନା ଆଉ କିଛି ?

ବହୁତ୍ ଖୁସି ହେବି ସେମାନଙ୍କୁ କଳାକାର ଭାବେ ଦେଖିବାକୁ୤ ତାହା ପ୍ରଭୁଙ୍କ ଇଛା ଉପରେ ନିର୍ଭର କରେ୤ ସେମାନେ ଆଗ ଭଲ ମଣିଷଟିଏ ହେବା ଦରକାର୤

(୧୯) ସଙ୍ଗୀତ ସାଧନାରେ ଆପଣଙ୍କ ପରିବାରର ସହଯୋଗ କିପରି ?

ଆଜି ପର୍ଯ୍ୟନ୍ତ ରହିଛି୤ ସବୁ ବାଧାବିଘ୍ନ ଭିତରେ ବି ମୋ ପରିବାର ମୋ ପଛରେ ଠିଆ ହୋଇଛି୤

(୨୦) କିଛି ସ୍ବତନ୍ତ୍ର ବା ନୂତନ ସୃଷ୍ଟି ?

ଏକ କ୍ୟାସେଟ୍‌ ମୁକ୍ତି ଅପେକ୍ଷାରେ ଅଛି୤ ମୁଁ ଏକ ସଙ୍ଗୀତ ଅନୁଷ୍ଠାନ କରିଛି ଯାହାର ନାଁ- ‘ସ୍ବରତୀର୍ଥ’୤ ଏହା ମାଧ୍ୟମରେ ମୁଁ ସଂସାରକୁ କିଛି ସ୍ବତନ୍ତ୍ର ଶୈଳୀର ସଙ୍ଗୀତ ଉପହାର ଦେବାକୁ ଚାହୁଁଛି, ଯାହା ସମାଜ ଉପରେ ଏକ ସକାରାତ୍ମକ ପ୍ରଭାବ ପକାଇବ୤

(୨୧) ଆଜି ଟେଲିଭିଜନମାନଙ୍କରେ ହେଉଥିବା ସଙ୍ଗୀତଭିତ୍ତିକ ପ୍ରତିଯୋଗୀତାରେ ଯେଉଁ ଜୁରୀମାନେ ଉପସ୍ଥିତ ରହୁଛନ୍ତି, ଆପଣ ସେଥିରେ ରହିବା ପାଇଁ ଆଗ୍ରହୀ ନୁହଁନ୍ତି ?

ଆଗ୍ରହୀ ନୁହେଁ୤ କାରଣ ରାଜନୀତିଠାରୁ ମୁଁ ଦୂରରେ ରହିବା ପାଇଁ ଚାହେଁ୤

(୨୨) ନିଜ ସମ୍ବନ୍ଧରେ ଗୋଟିଏ ଧାଡ଼ିରେ କୁହନ୍ତୁ୤

ପ୍ରତିଦିନ ପ୍ରତିମୁହୂର୍ତ୍ତରେ ପ୍ରଭୁଙ୍କ ନାମ ଗାଇ ବଞ୍ଚିଥିବା ଜଣେ ସାଧାରଣ ମଣିଷ୤

(୨୩) ନୂତନ ପିଢ଼ୀଙ୍କ ପାଇଁ କିଛି ବାର୍ତ୍ତା ?

ମା, ମମତା, କଳାସଂସ୍କୃତି ଓ ପରମ୍ପରାକୁ କ୍ଷତବିକ୍ଷତ ନ କରି ତାକୁ ସମ୍ମାନର ସହ ବଞ୍ଚାଇ ରଖି ନିଜର ଉନ୍ନତି ପଥରେ ଅଗ୍ରସର ହୁଅନ୍ତୁ୤

(୨୪) ଓଡ଼ିଆମ୍ୟୁଜିକ୍‌ଡଟ୍‌କମ୍‌ ପାଇଁ ଆପଣଙ୍କ ବାର୍ତ୍ତା ?

ପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦରୁ ଭଲରେ ଅଗ୍ରସର ହେଉ୤ ପ୍ରତ୍ୟେକ ଓଡ଼ିଆ ସଙ୍ଗୀତ ଜଗତର କଲ୍ୟାଣ ହେବା ସଙ୍ଗେ ସଙ୍ଗେ ଓଡ଼ିଆମ୍ୟୁଜିକ୍‌ଡଟ୍‌କମ୍‌ର ଏଭଳି ଏକ ନିଆରା ପଦକ୍ଷେପ ପାଇଁ ମୁଁ ଆପଣଙ୍କୁ ଆନ୍ତରିକ ଶୁଭେଚ୍ଛା ଓ ଧନ୍ୟବାଦ ଜଣାଉଛି୤

କିଛିମାସ ତଳେ ଏହି ସାକ୍ଷାତକାରଟି ଓଡ଼ିଆମ୍ୟୁଜିକ୍‌ ଡଟ୍‌ କମ୍‌ର ପ୍ରତିନିଧି ବିଶ୍ବରୂପ ଦାଶ ନେଇଥିଲେ୤
 

Speak Your Mind ( Tell us what do you think)

କମ୍ପ୍ୟୁଟର୍ keyboardର F12 ବୋତାମ୍ ଟିପି ଓଡିଆରେ ଲେଖିବା ଆରମ୍ଭ କରନ୍ତୁ କିମ୍ବା ଓଡିଆ କି-ବୋର୍ଡ୍ ନିର୍ଦ୍ଧାରଣ କରି ଲେଖନ୍ତୁ୤ ଓଡିଆ ଲେଖିବା ପାଇଁ କୌଣସି ବିଶେଷ softwareର ଆବଶ୍ୟକତା ନାହିଁ୤

Keyboard help for Odia typing