Share :

ଭୁବନେଶ୍ବର: ଗତ ୧୨ ତାରିଖ ସନ୍ଧ୍ୟାରେ ସ୍ଥାନୀୟ ରବିନ୍ଦ୍ର ମଣ୍ଡପ ମଞ୍ଚରେ ଏକ ଭିନ୍ନ ସ୍ବାଦର ଓଡ଼ିଶୀ ନୃତ୍ୟ ସମାରୋହ ଅନୁଷ୍ଠିତ ହୋଇଯାଇଛି୤ ପଦ୍ମଶ୍ରୀ ସଂଯୁକ୍ତା ପାଣିଗ୍ରାହୀଙ୍କ ସ୍ମୃତି ଉଦ୍ଦେଶ୍ୟରେ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର ଦ୍ବାରା ଆୟୋଜିତ ଏହି କାର୍ଯ୍ୟକ୍ରମର ଶୀର୍ଷକ ଥିଲା ‘ନବାଗତ ଓଡ଼ିଶୀ ନୃତ୍ୟଶିଳ୍ପୀ ସମାରୋହ’୤ ନବାଗତ ନୃତ୍ୟଶିଳ୍ପୀମାନଙ୍କର ନୃତ୍ୟ ଓ ସଙ୍ଗୀତରେ ଉପସ୍ଥିତ ଦର୍ଶକ ମନ୍ତ୍ରମୁଗ୍ଧ ହୋଇଥିଲେ୤

ଏହି କାର୍ଯ୍ୟକ୍ରମରେ ଓଡ଼ିଶାର ଖ୍ୟାତନାମା ନୃତ୍ୟ ଗୁରୁମାନଙ୍କର ଶିଷ୍ୟ ଓ ଶିଷ୍ୟାମାନେ ନିଜନିଜର ଅଭିନବ ନୃତ୍ୟଶୈଳୀ ପରିବେଷଣ କରିଥିଲେ୤ କାର୍ଯ୍ୟକ୍ରମ ପ୍ରାରମ୍ଭରେ ଗୁରୁ ରତିକାନ୍ତ ମହାପାତ୍ରଙ୍କ ସଂଯୋଜନାରେ ମଙ୍ଗଳଚରଣରେ ରିଙ୍କୁ କୁମାର ସାହୁଙ୍କ ଗୁରୁବନ୍ଦନା, ଗୁରୁ ପୀତାମ୍ବର ବିଶ୍ବାଳଙ୍କ ନିର୍ଦ୍ଦେଶନାରେ ଦିବ୍ୟଶ୍ରୀ ପଣ୍ଡାଙ୍କ ପଲ୍ଲବୀ-ରାଗ ଆଶାବରୀ, ଗୁରୁ ସୁହାଗ ନଳିନୀ ଦାସଙ୍କ ନୃତ୍ୟ ସଂଯୋଜନାରେ ତପସ୍ବିନୀ ପଣ୍ଡାଙ୍କ ଦ୍ବାରା ପଲ୍ଲବୀ-ରାଗ ଅରଭୀରେ ଅଭିନୟ, ଗୁରୁ ଗଜେନ୍ଦ୍ର ପଣ୍ଡାଙ୍କ ନିର୍ଦ୍ଦେଶନାରେ ଜି. ନାଗେଶ୍ବରୀ, ଗୁରୁ ଇଲିଆନା ସିତାରିଷ୍ଟିଙ୍କ ନୃତ୍ୟ ସଂଯୋଜନାରେ ଉପାସନା ମହାନ୍ତି, ଗୁରୁ କୁମ୍‌କୁମ୍‌ ମହାନ୍ତିଙ୍କ ନୃତ୍ୟ ସଂଯୋଜନାରେ ସ୍ବୟଂପ୍ରଭା ମିଶ୍ର ଆଦିଙ୍କ ନୃତ୍ୟରେ ଉପସ୍ଥିତ ଦର୍ଶକ ବିଭୋର ହୋଇଥିଲେ୤

ଏହିପରି ଏକ ସମାରୋହ ଆୟୋଜନ ମାଧ୍ୟମରେ ଓଡ଼ିଶୀ ନୃତ୍ୟ ସହ ଓଡ଼ିଶୀ ସଙ୍ଗୀତର ପ୍ରଚାର ପ୍ରସାର କରାଯାଇ ତାହାର ସୁରକ୍ଷା ପ୍ରତି ମଧ୍ୟ ଜନସାଧାରଣଙ୍କୁ ସଚେତନ କରାଯିବା ହେଉଛି ପ୍ରମୁଖ ଉଦ୍ଦେଶ୍ୟ ବୋଲି ଆୟୋଜକମାନେ ସୂଚନା ଦେଇଥିଲେ୤ ଏହି ଉଦ୍ୟମ ପାଇଁ ଓଡ଼ିଶୀ ଗବେଷଣା କେନ୍ଦ୍ରର ମୁଖ୍ୟ ନିର୍ବାହୀ ଅଧିକାରୀ ଗୁରୁ ରାମହରି ଦାସ ପ୍ରମୁଖ ଭୂମିକା ଗ୍ରହଣ କରିଥିଲାବେଳେ ଏଥିରେ ଓଡ଼ିଶା ରାଜ୍ୟ ସଂସ୍କୃତି ବିଭାଗ ସହଯୋଗ କରିଥିଲେ୤ ଆଗାମୀ ଦିନରେ ଏହିପରି କାର୍ଯ୍ୟକ୍ରମ ଆୟୋଜନ ଜାରି ରହିବା ସହିତ ଏଥିରେ ଅଧିକରୁ ଅଧିକ ନବାଗତ ନୃତ୍ୟଶିଳ୍ପୀ ଯୋଗଦେବେ ବୋଲି ସୂଚନା ମିଳିଛି୤

 

One Response

  1. Kshirod Sarangi says:

    ଓଡ଼ିଶାର ସଙ୍ଗୀତଜ୍ଞ, ଗାୟକ, ଗାୟିକା ଓ ନୃତ୍ୟଶିଳ୍ପୀଙ୍କୁ ରାଜ୍ୟ ତଥା ରାଜ୍ୟ ବାହାରେ ପରିଚିତ କରାଇବାର ପ୍ରୟାସ odiamusic.com ର ପଦକ୍ଷେପ ସ୍ବାଗତଯୋଗ୍ୟ ୤


Speak Your Mind ( Tell us what do you think)

କମ୍ପ୍ୟୁଟର୍ keyboardର F12 ବୋତାମ୍ ଟିପି ଓଡିଆରେ ଲେଖିବା ଆରମ୍ଭ କରନ୍ତୁ କିମ୍ବା ଓଡିଆ କି-ବୋର୍ଡ୍ ନିର୍ଦ୍ଧାରଣ କରି ଲେଖନ୍ତୁ୤ ଓଡିଆ ଲେଖିବା ପାଇଁ କୌଣସି ବିଶେଷ softwareର ଆବଶ୍ୟକତା ନାହିଁ୤

Keyboard help for Odia typing