Share :

ରାଉରକେଲା: ପ୍ରଥମ ଥର ପାଇଁ ଇସ୍ପାତ ସହର ରାଉରକେଲାଠାରେ ରାଜ୍ୟସ୍ତରୀୟ ତିନିଦିନିଆ ଓଡ଼ିଶୀ ସଙ୍ଗୀତ ଉତ୍ସବ-୨୦୧୪ ଅନୁଷ୍ଠିତ ହୋଇଯାଇଛି୤ ଚଳିତମାସ ୮ ତାରିଖରୁ ୧୦ ତାରିଖ ପର୍ଯ୍ୟନ୍ତ ଓଡ଼ିଶା ପର୍ଯ୍ୟଟନ ଏବଂ ସଂସ୍କୃତି ବିଭାଗ ଓ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର ଆନୁକୂଲ୍ୟରେ ସ୍ଥାନୀୟ ଭଞ୍ଜ କଳା କେନ୍ଦ୍ର ସହଯୋଗରେ ଭଞ୍ଜଭବନ ପ୍ରେକ୍ଷାଳୟରେ ଅନୁଷ୍ଠିତ ଏହି ଉତ୍ସବ ଗତକାଲି ସନ୍ଧ୍ୟାରେ ଉଦ୍‌ଯାପିତ ହୋଇଯାଇଛି୤ ଏହି ଅବସରରେ ଆରଏସ୍‌ପି ନିର୍ବାହୀ ନିର୍ଦ୍ଦେଶକ ମଞ୍ଜୁସକାନ୍ତି ଦାସ ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଶୀ ସଙ୍ଗୀତର ଏକ ମହାନ ପରମ୍ପରା ରହିଛି ଓ ଏହା ଜଗନ୍ନାଥ ସଂସ୍କୃତି ସହିତ ଜଡ଼ିତ ବୋଲି କହିଥିଲେ୤ ସମ୍ପ୍ରତି ଓଡ଼ିଶୀ ନୃତ୍ୟ ଓ ସଙ୍ଗୀତ ବିଶ୍ବ ଦରବାରରେ ପରିଚିତ ହୋଇ ଦିନକୁ ଦିନ ଅଧିକ ଲୋକପ୍ରିୟ ହେଉଥିବାରୁ ରାଜ୍ୟର କଳା ଓ ସଂସ୍କୃତିର ରାଜଧାନୀ ଭାବେ ପରିଚିତ ରାଉରକେଲାରେ ଏହିପରି ଏକ ଉତ୍ସବ ଅନୁଷ୍ଠିତ ହେବା ଗୌରବର ବିଷୟ ବୋଲି ଶ୍ରୀ ଦାସ କହିଥିଲେ୤ ଓଡ଼ିଶା ସଙ୍ଗୀତ ନାଟକ ଏକାଡ଼େମୀର ସମ୍ପାଦକ ଚିତ୍ତରଞ୍ଜନ ମଲିଆ ଉଦ୍‌ଯାପନୀ ସନ୍ଧ୍ୟାର ସ୍ବତନ୍ତ୍ର ଅତିଥି ଭାବେ ଯୋଗଦେଇ ରାଉରକେଲାର ପ୍ରମୁଖ ସାଂସ୍କୃତିକ ଅନୁଷ୍ଠାନ ଭଞ୍ଜ କଳା କେନ୍ଦ୍ର ସହଯୋଗରେ ଆୟୋଜିତ ଉକ୍ତ ଉତ୍ସବର ସଫଳତା ପାଇଁ ଆୟୋଜକମାନଙ୍କୁ ସାଧୁବାଦ ଦେଇଥିଲେ୤

ଉକ୍ତ ସଙ୍ଗୀତ ଉତ୍ସବର ବିଭିନ୍ନ ସନ୍ଧ୍ୟାରେ ପୁରୀର ପୁରାତନୀ କଳା ମନ୍ଦିର ଅନୁଷ୍ଠାନ ଓ ସଙ୍ଗୀତ ଶିଳ୍ପୀ ଗୁରୁ ଚନ୍ଦ୍ରମଣି ଲେଙ୍କା, ଭୁବନେଶ୍ବରର ପ୍ରଖ୍ୟାତ ମାର୍ଦ୍ଦଳ ବାଦକ ଡ.ଜଗନ୍ନାଥ କୁଅଁର ଓ ଗୁରୁ ଧନେଶ୍ବର ସ୍ବାଇଁଙ୍କ ସମେତ କଣ୍ଠଶିଳ୍ପୀ କୃଷ୍ଣଚନ୍ଦ୍ର ରାୟ ଓ ସଙ୍ଗୀତା ପଣ୍ଡା, ବାଲେଶ୍ବରରୁ ଆସିଥିବା କଣ୍ଠଶିଳ୍ପୀ ମାତୃପ୍ରସାଦ ଦାସ, କଟକରୁ କଣ୍ଠଶିଳ୍ପୀ ଅଖିଳ କୁମାର ଲେଙ୍କାଙ୍କ ସହିତ ପିପିଲିରୁ ଆସିଥିବା ଓଡ଼ିଶୀ ସଙ୍ଗୀତ ବିଶାରଦ ସର୍ବେଶ୍ବର ବଇଠାରୁ ଭିନ୍ନଭିନ୍ନ ସଙ୍ଗୀତ ପରିବେଷଣ କରିଥିଲେ୤ ଏହା ବ୍ୟତୀତ ଇସ୍ପାତ ସହରର ପ୍ରମୁଖ ସଙ୍ଗୀତ ଅନୁଷ୍ଠାନ ଭଞ୍ଜ କଳାକେନ୍ଦ୍ର ଓ ମ୍ୟୁଜିକ୍‌ ସର୍କଲ୍‌ର କଳାକାରଙ୍କ ସମେତ ପ୍ରତିଷ୍ଠିତ କଣ୍ଠଶିଳ୍ପୀ ବୀଣାପାଣି ରଥ, ଆଶାଲତା ଷଡ଼ଙ୍ଗୀ ଓ ବେହେଲା ବାଦକ ଶରତ ଧଳ ପ୍ରମୁଖ ମଧ୍ୟ ଉକ୍ତ ଉତ୍ସବରେ ସଙ୍ଗୀତ ପରିବେଷଣ କରି ଉପସ୍ଥିତ ସଙ୍ଗୀତପ୍ରେମୀ ସ୍ରୋତାଙ୍କୁ ମନ୍ତ୍ରମୁଗ୍‌ଧ କରିଥିଲେ୤

ଭଞ୍ଜ କଳାକେନ୍ଦ୍ରର ସାଧାରଣ ସମ୍ପାଦକ ରାଧାକୃଷ୍ଣ ମହାପାତ୍ରଙ୍କ ସମେତ ଅନ୍ୟ ସଦସ୍ୟ ଓ କର୍ମକର୍ତ୍ତାମାନଙ୍କ ସକ୍ରିୟ ସହଯୋଗରେ ଅନୁଷ୍ଠିତ ଉକ୍ତ ଉତ୍ସବରେ ରାଉରକେଲା ଏବଂ ଆଖପାଖରୁ ଅନେକ ସଙ୍ଗୀତପ୍ରେମୀ ଦର୍ଶକ ଉପସ୍ଥିତ ରହି ପ୍ରତିଦିନର ସଙ୍ଗୀତ ସନ୍ଧ୍ୟାକୁ ଉପଭୋଗ କରିଥିଲେ୤

 

One Response

  1. Rashmin Kumar Mahapatra says:

    Thank you for this event. Suggest we do these types of events in other cities of Odisha as well.


Speak Your Mind ( Tell us what do you think)

କମ୍ପ୍ୟୁଟର୍ keyboardର F12 ବୋତାମ୍ ଟିପି ଓଡିଆରେ ଲେଖିବା ଆରମ୍ଭ କରନ୍ତୁ କିମ୍ବା ଓଡିଆ କି-ବୋର୍ଡ୍ ନିର୍ଦ୍ଧାରଣ କରି ଲେଖନ୍ତୁ୤ ଓଡିଆ ଲେଖିବା ପାଇଁ କୌଣସି ବିଶେଷ softwareର ଆବଶ୍ୟକତା ନାହିଁ୤

Keyboard help for Odia typing